مصر والمصريين .. ادعي على ابني واكره اللي يقول امين
كتب د. حماده العنتبلي
اسمحولي وانا باكتب النهاردة هاكتب بالعامية .. لاني هاتكلم وهاوصف احساس ميوصلوش الا العامية ... لاني هاتكلم عننا كمصريين وعن بلدنا مصر .. احنا كمصريين عندنا تركيبة غريبة متلاقيهاش في اي مكان غير مصر .. ننتقد بلدنا ونلعن ابو الظروف وضيق الحال ولكننا بنعشق بلادنا لحد الجنون ونعادي وممكن نقتل كل اللي يتعدى في حق بلدنا ونموت لأجلها واحنا مبسوطين .. وفيه مثل دايما بتقوله امهاتنا .. ادعي على ابني واكره اللي يقول آمين .. حب المصريين لمصر حاجه كده ميوصفهاش كلام ومهما قال الشعراء ميقدروش يعبروا عنها تحس اننا وامهاتنا برتضعنا .. كان لبن الام ممزوج بتراب وحب مصر ... من المنطلق دا تلاقي انه لما تيجي اي دولة من المفترض انها دولة شقيقة وتاخد اجراءات ضد مصر او حظر طيران او غيره تلاقينا الدم غلي في عروقنا واخدتنا حمية صعيدي .. ياجماعة بكل بساطة لكل دولة الحرية في اي اجراء تاخده .. الموضوع سياسة نفعية بحتة مثلا في موضوع #فيروس_كورونا.. فيه كتير من الدول عندها حالات بالالاف ولكن عدم وجود حالات في مصر كان عامل هستيريا لناس كتير وكان الكلام مصر بتخبي ومعندهاش شفافية ولما اعلنا بقينا نقول ياعيني دا طلع عندهم كورونا وهيعملوا ايه .. بس دا ميديش الحق لاي حد انه يتطاول في حق مصر ... #مصر_أم_الدنيا .. غصب عن اي حد .. واحنا كمصريين اجدع من أي حد .. لف الدنيا طولها وعرضها مش هتلاقي الدفا اللي في مصر .. والمصريين يعني الضحكة الحلوة اللي تترسم على وجه ماليه الشقا والتعب .. بس برضه بنحبها .. في مصر تلاقي كل حاجه والعكس علشان كده كان فيلم عسل اسود للفنان العبقري أحمد حلمي بيعبر عننا بكل تفاصيلنا وحتى أغانيه كانت معبرة جدا .. وفي النهاية اتذكر كلمات شاعر النيل #محمد_حافظ_إبراهيم في قصيدته #مصر_تحدث_عن_نفسها ..
أَنا تاجُ العَلاءِ في مَفرِقِ الشَـــــــــرقِ وَ دُرّاتُهُ فَـرائِدُ عِـقـدي
... مصر هي الحكاية .. وفيها خلص الكلام